Gernikako Eguneko Ospitalean hilero egiten ditugun komunitateko jardueren barruan, apirilaren 17an, Mungiako Gurutze Gorria bisitatu genuen.

Elkarte hori 100 bat boluntariok osatzen dute, eta modu aktiboan parte hartzen dute hainbat gizarte-zereginetan, hala nola: Elikagaien Bankuaren kudeaketa, jostailuen kanpaina, gosari- eta askari-kanpainak, hainbat material doan mailegatzea (gurpil-aulkia, makuluak, ohe artikulatuak), hirugarren adinekoen
egoitzako erabiltzaileei laguntzea, desagertutako pertsonak erreskatatzeko lanetan laguntza logistikoa ematea.

Goizeko bigarren zatian, udalak ekitaldi honetarako utzitako udal-karpa batera joan ginen, eta, han, lehen laguntzako 4 tailer egin genituen:
- Sendaketa-tailerra
- Anbulantzia-tailerra
- Segurtasuneko albo-posizioko tailerra (PLS) eta eztarri-trabatzeak
- BBBko eta desfibriladoreko tailerra

Erakutsi ziguten nola jokatu kontingentzia arruntenen aurrean, eta larrialdi-egoeretan jarduteko protokoloak zaurituari eta sorosten duenari segurtasun handiagoa bermatzeko.

Oso goiz zoragarria eta aberasgarria izan zen.

Carmen Devesa

Historia klinikoak funtzionalitate berria du bideo-kontsulta asistentzialak egin ahal izateko.
Osabide Globalean integratutako tresnak aukera emango die profesionalei eta pazienteei kontsultak Zoom bidez egiteko.

Sistema baliagarria izan daiteke jarraipen-kontsultetarako eta/edo zentrora joateko zailtasunak daudenean (distantzia, garraio publikoa, etab.). Hala ere, bideo-kontsulta horiek egiteko, profesionalaren eta pazientearen arteko aldez aurreko akordio bat egon behar da.
eOsabideko agendan funtzionalitate berri hau izan nahi duten profesionalek mezu elektroniko bat bidali behar dute honako helbide honetara:

rsmb.informatica@osakidetza.eus

Eskaera egin ondoren, profesional bakoitzaren agendak eta Osabide Global konfiguratuko dira, eta prestakuntza labur bat emango zaie eOsabideko agendan bideo-kontsultako hitzordua nola sortu irakasteko, ikusteko pazienteari nola iritsiko zaion hitzordua, eta, azkenik, jakiteko bideo-kontsulta nola ezarriko den Osabide Globalaren eta Zoomen bidez.


BOMSeko informatika

BPSO zabaltzeko taldeak pertsona motibatuak behar ditu, sormena garatu nahi dutenak eta ekintza puntualen batean edo modu jarraituan parte hartzera animatzen direnak, gure osasun mentaleko zentroetan ebidentzian oinarritutako praktikei buruzko edukiak zabaltzeko.
Nola parte hartu jakin nahi baduzu, begiratu beheko estekako kartela!

Nor gara gu?
Talde bat gara eta helburu bat dugu: BOMSeko talde asistentzialek egiten dituzten jardunbide egokiak eta horien eragina zabaltzea eta komunikatzea. BPSO programa nazioarteko irismena duen proiektua da, eta ebidentzian oinarritutako Jardunbide Egokien Gidak ezartzea eta horien emaitzak ebaluatzea du jomuga, hainbat osasun-erakundetako asistentzia-kalitatea hobetzeko, besteak beste, BOMSekoa.

Ba al dago parte hartzeko baldintzarik? Ez da beharrezkoa aldez aurretik esperientzia izatea, ezta gidak ezagutzea ere. BOMSen lan egiten duen edonork idatz diezaguke. Gehiago jakin nahi baduzu, lanean zerbait berria ezagutu nahi baduzu edo kartelean planteatutako zereginen batean parte hartu nahiko bazenu, anima zaitez gurekin harremanetan jartzera beheko estekan dagoen kartelean aurkituko duzun formularioaren bidez.

María Maidagan

Lmentalaren zenbaki honetan, funtsezko 6 aholku ematen dizkizuegu segurtasun handiagoz nabigatzeko Interneten.

Ingurune digitala gero eta konplexuagoa denez, ematen dizkizuegun aholku labur hauek alde handia eragin dezakete segurtasunez lan egitearen edo zibereraso bati atea irekita uztearen artean, aintzat hartuta ondorio larriak ekar ditzakeela, bai maila pertsonalean, bai korporatiboan. Horregatik gomendatzen dizuegu infografiari begiratzea: 30 segundo besterik ez dituzu beharko.

E.G.

Dakizuenez, BOMSek gogobetetasun-inkesta bat egiten die bi urtean behin bertan lan egiten duten pertsonei.
Azken inkestan Sarean lan egiten duten pertsonen ia erdiek erantzun dute, eta parte-hartzearen indizea % 44koa izan da.
Ondorio hauek azpimarra ditzakegu:
Ondoen baloratutako 3 itemak honako hauek izan dira:
1. Emakumeen eta gizonen berdintasuna (7,88)
2. Lan-giroa eta harremanak (7,59)
3. Lidergoa (7,28)
Okerren baloratutako 3 itemak:
17. Baldintza fisikoak eta ingurumenekoak (6,23)
18. Beste arlo batzuei buruzko informazioa (5,86)
19. Barne-sustapena (5,54)


2021ean egindako inkestari dagokionez, honako alde hauek ikusten ditugu:
1.- Parte-hartzea zertxobait handiagoa izan zen: % 52
2.- Igoera handiena izan duten hiru esparruak honako hauek izan dira:
- Prestatzeko aukerak (+0,67)
- Jasotako prestakuntza-ekintzak (+0,43)
- Emakumeen eta gizonen arteko berdintasuna (+0,37)
3.- Oro har, honako hau da pixka bat jaitsi den eremua:
- Aplikazio eta programa informatikoak (-0,05)
Zuzendaritza zehatz-mehatz aztertzen ari da emaitza horiek, esparruka eta lanbide-kategoriaka, hobetu beharreko alderdiak detektatzeko eta neurri zuzentzaileak aplikatzeko.
Ekainean zehar, intranet bidez emaitzen berri emango da zehatz-mehatz.

Joan den maiatzaren 7an, BAME; BAPE eta BAEE berriak sartu ziren BOMSeko Irakaskuntza Unitate Multiprofesionalean. Ohitura denez, egun batzuk geroago, prestakuntza-irteera bat egin genuen haiekin, eta oraingoan Argia Fundazioa ezagutzera joan ginen.

Eva Garnica

Hainbat hilabetez tutore nagusien artean bilerak egin ondoren, joan den maiatzean txandakatze sistematizatu bat hasi zen, BOMSeko arlo komunitarioko haurren eta nerabeen zentroetan: Bilboko HNOMZ, nerabeen EO eta Ortuellako HUT.

Bi aldeen helburua sinergiak eta etorkizuneko aliantzak sortzea da, eta, batez ere, haurren eta nerabeen osasun mentalaren eremua eta erizaintzatik egiten diren abordatzeak ezagutzea.

Pediatriako lau BAEE hasi ziren txandakatzen diziplina anitzeko taldeetan zeregin asistentzialak egiten dituzten OMko erizainak dauden zerbitzuetan.

Berrikuntza gisa, lehen egunean jardunaldi bat egin zen, aipatutako zentroetako laguntzako lau tutoreek antolatua. Harrera eta elkar ezagutzea zituen helburu nagusi, baina formatu horrek honako hauek ere ahalbidetu zituen:
- talde-esperientzia labur bat egitea eta BAEEak 1. pertsonan jartzea, haurren eta gazteen osasun mentalaren esparruan hain funtsezkoa den tresna terapeutiko hori erabiliz. Bineta klinikoen bidez, gaur egun zerbitzuetara jotzen duten haur eta nerabeen psikopatologia adierazgarrienera hurbiltzen lagundu genuen.
- espazio teoriko bat eskaintzea haurren eta nerabeen osasun mentalaren alderdi etiko-legalei buruz, eta baliabideak aurkeztea, haietako bakoitzaren alderdi bereizgarrienak aipatuz eta erizaintzako funtzio garrantzitsuenak deskribatuz.

Jardunaldia amaitzean ebaluazio bat egin zen, eta emaitzak onak izan ziren.

BAEEn parte-hartze aktiboak elkarrizketa erraztu du, guztiok pentsatze-lanean jarri baikara, laguntza-egoera konplexuak partekatuz.

Sonia Herrera eta Izaskun Eraña

2015ean, Ricard Ruiz Garzón idazle katalanak "LAS VOCES DEL LABERINTO: HISTORIAS REALES
SOBRE ESQUIZOFRENIA" argitaratu zuen, bere istorioak eta bizipenak azaldu zizkioten pazienteekin
egindako 100 bat elkarrizketen emaitza sentikorra. Bere garaian honela deskribatu zen: "lekukotasun-hurbilketa bat, gaixoen ikuspuntua lehenesten duen benetako kasuen birsorkuntza bat, topikoak hausteko, aurreiritziak uxatzeko eta eskizofrenikoa deritzonak gure gizartean oraindik pairatzen duen estigma suntsitzen laguntzeko".

Ia hamabost urte geroago, Alfredo Borés (sail honetan aipatutako "La locura.Un elogio de la diferencia" alde grafikoaren arduradunak bost istorio kondentsatu zituen eleberri grafiko batean, kapitulu independenteak baina elkarri lotuak dituena, erasandako beste hainbaten esperientziak biltzen dituena.Bere izenburua, inspiratu zuen jatorrizkotik sotilki aldatua, "LAS VOCES Y EL LABERINTO" da.

J.M.

Joan den apirilaren 25ean eta 26an, Eboluzioari eta Neurozientziei buruzko Jardunaldi Nazionalen VI. edizioa egin zen, eta BOMSeko psikiatrak (Eva Garnica eta Pablo Malo, erretiratua) antolatu genituen EHUko Kultura Zientifikoko Katedrarekin. Nazioartean bakoitza bere arloan erreferente diren hizlariak bildu genituen. Hitzaldietako bideoak eskuragarri dituzue, irekita eta doan, beheko estekan.

Eva Garnica

"Intxaurrak burmuinarentzat" Youtubeko kanaleko azken bideoan probiotikoen eta osasun mentalaren arteko harremanaren zati bat aztertzen dugu.


Eva Garnica

Oraingo honetan oso artikulu bitxi bat ekarri dizuegu, 2013 urrun hartan Fundación Educación Médica aldizkarian argitaratutakoa. Bertan, Beautiful Brains taldearen lan musikala aipatzen zuten; eta, egileen esanetan, 1990eko hamarkadan mediku psikiatraz osatutako psikorock estiloko taldearen abestiak, batere serioak ez zirenak, baliagarriak gerta zitezkeen irakaskuntzan.

Artikuluak dioenez, Beautifuil Brains taldea Zamudioko Ospitalean (Bizkaia) sortu zen, eta kasualitatez, toki horretan ere dute jatorria The Txori Herri Medical Association elkarte zientifiko ospetsuak eta haren nazioarteko argitalpen zientifikoak (The Txori Herri Medical Journal).

Formatu desberdinetako grabazioak egiteaz gain (kasete-zintak, VHS bideoak, YouTubeko bideoak), taldeak estudioko hiru CD ere baditu eginda: “Creo en Emil Kraepelin” (1995), “Toma la Medicación” (1999) eta “447” (2011). Artikuluak taldearen kantu mitiko batzuk aztertu zituen, psikorockean aro bat markatu zutenak, eta mundu erdiko eszenatokiak irauli zituztenak; horien artean “Serotonina” arrakastatsua, “Amor Médico-Paciente” erromantikoa, edo “Panfilón” rokeroa (kontzertuetan ondo txalotua izan dena).

Hona hemen letretako zati batzuk, ikus dezazuen, irakaskuntzan aplikatuta, zenbat ikas daitekeen neurotransmisioari (serotonina), sendagaien marketinari (panfiloia) eta nortasun-nahasmendu exotikoei (nortasun bikoitza) buruz.

“Buenas, doctor, hoy le presentamos un producto canÞoìn.]
Cura la depre en cuatro días, esto, doctor, es una maravilla.]
No tiene efectos secundarios, lo hemos probado ya en gatos.]
Y encima quita las espinillas, esto doctor es una maravilla.]
Panfiloìn, Panfiloìn, asesino de la depresioìn. Panfiloìn, Panfiloìn, antidepresivo campeoìn.”

Elkarrizketak emateko zaletasun handirik ez duten arren, jakin dugu azken urteotan lanean aritu direla hainbat eta hainbat talderekin, taldekide berriak batu zaizkiela, beste batzuk joan direla, eta elkarlanean aritu direla ospe handiko artistekin (esaterako, Doctor Deseoko Francis-ekin, noraino eta agertokia partekatzeraino Bilbo Rock aretoan), baina inoiz ere galdu gabe izpiritu rockeroa eta politikoki okerra den euren talentu kritikoa.

J.U.

Intraneten daude, Profesionalen atalaren barruan, Prestakuntzan, 2024rako planifikatutako prestakuntza-jarduerak. Bigarren seihilekoa zehazten ari gara. Begiratu beheko eranskinean

107. zenbaki honetako kolaboratzaileak: Carmen Devesa, María Maidagan, Eva Garnica, Juan Medrano, Sonia Herrera, Izaskun Eraña, BOMSeko informatika