Otsailaren 15ean BOMSeko liderrei aurkeztu zitzaizkien BOMSeko 2018ko balantzea eta 2019ko Kudeaketa Plana. Informazioa jaso zuten asistentzian, ekonomian eta pertsonen kudeaketan izandako emaitza nagusiei buruz. Gainera, azaldu ziren aurten aurrera eramango diren egitasmorik garrantzitsuenak.

Horiek bultzatuz, helduko diegu azken gogoeta estrategikoan finkatu ziren 4 erronkei; edo bestela esanda, hurbilduko gara aurreikusitako 4 gailurretara. Horiek baitira gure erreferentzia 2021. urteari begira.

Kudeaketa Plana ikusgai dago Intraneteko ESTRATEGIA atalean (beheko loturan)

M. L.

Aurreko zenbakian, gure estrategiaren beste elementu batzuekin batera, aurkeztu genizuen BOMSek, 2021. urteari begira, daukan ikuspegia:
Gure erakundeak Bizkaiko biztanleen ongizatea hobetu nahi du, eta osasun mentaleko arreta bikaina eta eraginkorra eskaini, profesional aditu eta konprometituen laguntzarekin, gizartearen onespena lortzeko.

Horiexek dira gure helburuak; eta lortzeko 4 gailur iritsi behar ditugu:
1.Eredu komunitario asistentziala sendotu behar dugu, lankidetzan arituz osasun mentalaren esparruko eragile guztiekin batera.
2.Bultzatuko dugu pazienteak eta beren laguntza-sareak parte har dezatela asistentzia prozesuko erabakietan. Horregatik, erakundeak aintzat hartuko ditu beroien iritziak, ikuspegiak eta esperientziak.
3.Profesionalen beharrak planifikatzeaz eta kudeatzeaz gain, sustatuko dira euren konpromisoa eta talde-lana.
4.Osasun arloko emaitzak eta bizi-kalitatea hobetu nahi ditugu, eta baita ematen dugun arretaren eraginkortasuna ere. Gure erakundeak gizartearen alde egiten du lan, eta zentzuz erabiltzen ditu bere baliabideak, ingurunea zaintze aldera.

Beheragoko loturaren bitartez ikusi eta entzun ahal izango duzu BOMSeko profesional-talde batek emandako azalpena iritsi nahi ditugun 4 gailurren gainean.

Ez galdu Lmentalaren hurrengo zenbakia, baldin eta jakin nahi baduzu zein diren asistentzia-ereduaren
1. gailurra iristeko aurreikusi diren ekintzak. Pista guztiak edukiko dituzu eskura, ondo presta zaitezen eta lehen tontorreraino heltzeko.

Marijo Llarena

Gaurko kudeaketa-ereduari jarraituz, erakunde aurreratu batek, bezeroak, baliabideak, pertsonak eta berrikuntza ez ezik, bere inguru soziala ere kudeatu behar du. Baina, zein da erakunde baten inguru soziala?

Hainbat eragilek eratzen dute inguru soziala: elkarteak, instituzioak, administrazioak hezkuntza-zentroak, herritarrak eta abar; eta guztietan izan dezakete eragina erakundearen erabakiek eta ekintzek, onerako zein txarrerako,

BOMSek, inguru sozialaren beharrak antzeman ondoren, aztertu ditu zer gaitasun eta baliabide dituen beroietan eragiteko. Horrela zehaztu ahal izan ditu egin beharreko ekintzak, gizartearekin duen konpromisoa betetzeko asmoz.

BOMSek konpromisoa hartzen du:
 1.Hobetzeko desgaitasuna duten, beharrean dauden, eta baztertzeko arriskuan dauden pertsonen bizi-kalitatea, Bizkaian.
 2. Gaixotasun mentalaren estigma borrokatzeko.
 3. Gizartearekin partekatzeko duen ezagutza, helburu hauei begira:
. Profesional-belaunaldi berriei prestakuntza eman: osasun arlokoei, zein beste arlo batzuetakoei.
. Prestakuntza eman gaixotasun mentala duten pertsonak artatzen dituzten profesionalei.
. Ezagutza zabaldu topaketa zientifikoetan (jardunaldiak, biltzarrak, aldizkariak, eta abar.)

Informa zaitez gizartearekin dugun konpromisoaren gainean, eta parte hartu!!!

Marijo Llarena

Gizartearekin dugun konpromisoari men eginez, lankidetzan aritu gara Peñaskal Fundazioarekin arropa biltzen, kalean bizi diren pertsonei laguntze aldera.
Peñaskal Fundazioa hirugarren sektoreko elkarte bat da, eta eurekin lan egin ohi dugu, bere lan esparruaren barruan baitago buruko nahasmendua duten pazienteak babestea.
Ekimenean parte hartu dute sareko ospitale eta zentro gehienek; eta esan ahal dugu kanpaina arrakastatsua izan dela, lortu baitugu manta eta neguko arropa asko biltzea.

Eskertu nahi dizkizuegu gizartearen alde erakutsitako interesa eta emandako laguntza.
Bereziki nabarmendu behar da Bermeoko Ospitaleak eta Ortuellako Eguneko Ospitaleak egindako ekarpena. Zentro horietan paziente talde batzuek gogoz hartu dute parte kanpainan. Hurrengo zenbakietan azalduko dugu zehatzago zelako ekarpena egin duten.

Bejondeizuela erakutsitako elkartasunagatik !!!!

Marijo Llarena

Gaixotasun mentalaren inguruko estigma borrokatzea da BOMSek gizartearekin duen konpromisoetako bat.

Athletic Fundazioarekin dugun lankidetzari esker, BOMSeko erabiltzaileak joan ahal izan dira urtarrilaren 30ean emakumezkoen Bilboko Athletic-ek eta Atletico Madrilek jokatu zuten kopako futbol partidara.

Leire Fentanes y Marijo Llarena

Beste urte batez Gabonetako jaia egin dugu unitatean, gogoz eta gozamen handiz egin ere. Gainera, aurten izan dugu nekazaritzako taldeko monitore Nekane Riestraren ekarpen paregabea, eta baita Onintza Furundarena eta Ana Parra monitoreenak ere (Errehabilitazioko Unitateko Eguneko Ospitalea, eta Terapia Okupazionala, hurrenez hurren).

Urtarrilaren 16an egindako otorduarekin ospatu genuen unitateko eta patologia dualeko paziente talde batek 4 hilabete igaro dituela ezer kontsumitu gabe.
Ospakizuna hain zen gozagarria eta lasaia, non uste dugun berriro ere egin behar ditugula bai bazkaria, bai bazkalondoa.

Elena Rodríguez Seoane. Errehabilitazioko Unitateko eta Eguneko Ospitaleko erizaina.

Esperimentu zientifiko errazak eta dibertigarriak egiten ditugu, adin eta ezagutza-maila guztietako pazienteak teknologia berrietara hurbiltzeko.
Gure asmoa da pazienteek ezagutza berriak berengana ditzaten, talde-lana sustatzea, eta berdinen arteko lankidetza bultzatzea. Gainera, elkartasuna eta enpatia bezalako balioak lantzen ditugu.

Planifikazioa:

-Telematika: hologramak.
-Irudiak: dokumentalak erabili dira, hologramez gehiago jakiteko. Eztabaidak egin dira, eta parte-hartzaileek gaiari buruzko informazioa bilatu dute.
-Esku-lanetako tailerra: piramide holografikoa egin da, 3D irudiak ikusi ahal izateko.
-Esperimentua egin da, eta gero mugikorrean irudiak ikusi ditugu piramide holografikoa baliatuz.

Ziortza LLona Lasagabaster (Zamudioko Ospitaleko monitorea).

Egunkarian aurkitzen dugun ohiko hieroglifikoak gaitasuna du hainbat esparrutako gauzak lotzeko: musika, zenbaki erromatarrak, kimika edo gramatika, adibidez. Eta behin guztiak uztartuta, lortu ahal dugu asmakizuna argitzea.

Horri jarraituz, pazienteei egunero planteatzen dizkiegu hieroglifiko pare bat, eta lortzen dugu pixkanaka mundu horretan murgiltzea. Izan ere, irakasten diegu nola kokatzen diren nota musikalak pentagrama batean, sol notatik hasi eta eskala osatzeraino; edo zein diren elementu kimikorik arruntenen ikurrak, zenbaki erromatarren sinboloak. Horiekin batera, marrazki jakin batzuen esanahia ere azaltzen diegu.

Egunero, zentrora heltzen direnean, erronka bat proposatzen zaie, eta asmakizuna argitzen dutenean ikusten dute besteek txalotu eta balioesten dituztela. Azken buruan, ohartzen dira gai direla gauza berriak ikasteko, euren gaixotasuna gorabehera, eta zeregin horretan gozatu egiten dutela.

Juan Enrique López Fernández. Erandioko Eguneko Ospitaleko monitorea.

Beste urte batez egin da Bizkaiko osasun mentaleko egoiliarren jardunaldia otsailaren hirugarren ostegunean. Oraingo honetan Galdakaoko Ospitaleko egoiliarrak arduratu dira antolaketaz, eta Bizkaiko irakaskuntzako 4 unitateak deitu dituzte goiburu honekin: “Psiquiatría transcultural. El impacto de la globalización en la atención sanitaria”.

BOMSeko irakaskuntzako unitateko egoiliarren aurkezpenaren izenburua “Retos en la asistencia en salud mental transcultural” izan da. Bertan, alde batetik, jaso dira “Instrumento para la valoración de la competencia intercultural en la atención en salud mental” tresnarekin lortutako datuak (behin bilduta gure zerbitzuko 50 profesionalen erantzunak); eta bestetik, ezagutzera eman dira erantzunen harira egindako gogoetak.

Gaiari buruzko bi hitzaldirekin amaiera eman zaio otsaileko topaketari. Eta bestela ezin zenez izan, agur esan diogu aurtengo jardunaldiari adiskideen arteko bazkari entretenigarri batekin.

O.M.

Nafarroako Unibertsitateko (CUN) Medikuntza Fakultateko psikiatriako tutoreek Irakaskuntzako Unitatekoei eskatu ziguten azaltzea gure ikasleekin erabiltzen dugun metodologia; eta zehatzago esanda, gehiago jakin nahi zuten erabiltzen ari garen jokoen teknikaz.

Urtarrilaren 11an egindako topaketara bertaratu ziren, psikiatriako irakasleak ez ezik, medikuntzako espezialitate batzuetako irakasleak ere; eta horiekin batera, medikuntzako zenbait ikasle, irakaskuntzan baliatzen diren metodologiak ezagutzeko interesa zutenak.

BOMSeko Irakaskuntzako Unitatean, 2017tik hona, “ihes-gelak” ari gara erabiltzen irakasteko metodo gisa. Beste esparru batzuetan erabiltzen ari ziren, baina guk dakigunez, ez psikiatriako, psikogiako eta eraizaintzako barne egoilarren irakaskuntzan. “Ihes-geletan” tartekatzen ditugu jokoetan ohikoak diren probak eta “osteguneko eskolan” jorratutako gaieri buruzko galderak. Gero, puntukako sistema baten bitartez lehiatzen dira parte hartzen duten taldeak.

Nafarroako Unibertsitateak egindako eskaerari erantzun nahi izan diogu gure unitatea beste modu batera ezagutzera emateko, eta beste leku batzuetako profesionalek gure berri izan dezaten

Eva Garnica. Psikiatriako espezialitateko tutorea.

2019ko otsailaren 8an, ostiralarekin, BOMSeko langileok egoitzako ekitaldi-aretoan bildu ginen, 2018an erretiratu diren lankideak omentzeko. Izan ere, eskertu nahi izan genien denbora honetan egindako lana, eta baita opa ere onena izan dezatela euren bizitzako etapa berrian.

Lankide eta senitartekoez gain, ekitaldian egon zen Osasun Mentaleko Sareko zuzendaritza-taldea. Zuzendariek esker oneko hitz batzuk esan zizkieten erretiratuei, eta horiekin batera oparitxo bana eman zieten.

Espero dugu, haiek ere, guk bezala, une hunkigarria bizi izana.

Periskopioaren begia hain da zorrotza non berehala harrapatzen dituen gure profesionalek prentsan egiten dituzten agerraldi guzti-guztiak.

Oraingo honetan Pablo Malori El Correo egunkarian egin dioten elkarrizketa bat izan da, berak emandako hitzaldi baten harira. Izan ere, ekitaldi bat egin zen Bilboko Bidebarrietako Liburutegian: “La evolución del lenguaje y el suicidio y la teoría de la evolución en el Día de Darwin 2019” izenekoa; eta bertan txosten bat aurkeztu zuen Pablok. Berbaldiaren grabaketa eta guzti lortu dugu, eta YouTuben dago ikusgai (48. minututik aurrera. Beheko loturan duzue).

Otsailaren 12an egindako emanaldia antolatu zuten EHUko Kultura Zientifikoko Katedrak eta Zirkulu Eszeptikoak, Charles Darwing-en jaiotzaren 210. urteurrena oroitze aldera.

M. L.

Batera doaz errekuperazio-ereduan ematen diren aurrerapausoak eta gizartean gertatzen diren aldaketak; eta aurrerapen horren eragileetako bat herritar aktiboak dira. Bilboko eguneko ospitaleetako lantaldeetako kideoi bereziki interesgarria iruditu zitzaigun gehiago jakitea eragile horiei buruz. Halatan, harremanetan jarri ginen AVIFESekin, jakin genuelako euren “Aurreraka” programak partaidetza aktiboa sustatzen duela.
Ondo asko asebete gintuen euren erantzuna. Izan ere “En primera persona SPIK” taldeko kide batzuk (bozeramailetzaz eta iritziaz arduratzen direnak) prest agertu ziren bi orduko hiru saio emateko Bilboko eguneko hiru ospitaleetan (Garamendi, Txurdinaga eta Ajuriaguerra).

Saioak aberasgarriak izan ziren guztiontzat, zeren ikusarazi zizkiguten aurrera eraman daitezkeen ekimenak eta eskura ditugun aukerak. Gainera, itxaropena eta lan egiteko gogoa transmititzearekin batera, ikusi genuen eredugarriak direla estigmaren aurkako borrokan.

Mariasun Garay Arostegui

Javi ezaguna dugu, Lmentalan egindako beste erakusketa birtual batzuengatik. Egia esan, sorta bat dauka eginda dagoeneko. Bere arte-lana gurekin partekatzen du berriro, baina oraingo honetan, erakusketa virtual honetaz gain, zuzeneko beste bat aurkeztuko du Basauriko Pozokoetxeko kultura-etxean.

Javik Basauriko OMZn elkartzen da, hamabost egunean behin, artean interesa duen talde batekin. Horixe bera da Soniaren kasua ere, berak gozatzen baitu poesia sortzen. Eta Soniak ere Lmentaleko irakurleokin partekatu ohi ditu bere lanak.

O.M.

Sonia Lmentalako ohiko laguntzaile dugu. Gozatzen du bere bizitza poesietan islatuz, eta buletin honetako irakurleokin partekatuz.

Javiren talde berean dago, eta bertan euren interes partikularrak ez ezik interes artistikoak ere partekatzen dituzte, eguneroko bizitzak eskaintzen dienetik harago. Horregatik uste dugu bere idazki laburrek geure egunerokotasuna argitu eta inspiratu ahal dutela.

Eskerrik asko, Sonia.

O.M.

Sailkapen Orokorra - 6. JARDUNALDIA

Taldea- Puntuak

1 BILBAO LEHENAK 12
2 MANUENE 9
3 ARGIA 7
4 GORANTZA 7
5 DURANGO 6
6 ERAGINTZA 6
7 ASASAM 4
8 BARAKA 3
9 ZAMUDIO 3
10 GASTEIZ- S.J.D. MONDRAGON 1

Hil honetako fitxan berreskuratuko dugu XIX. mendeko amaierako eta XX. mendeko hasierako Philippe Chaslin psikiatra frantsesaren figura. Oso ezaguna izan zen sortu zituen bi kontzepturengatik: “buru-nahasmendua”, eta “diskordantzia”. Biak garatu zituen bere bi lanik handienetan: Confusión mental primitiva (Buru-nahasmen primitiboa), eta Elementos de semiología y clínica mentales (Semiologiaren eta klinika mentalaren elementu batzuk).

Bere baitara bildutako pertsona izan zen; eta baita jakintsua ere. Bera da Pitié-Salpêtrière ospitaleko XIX. mendeko zerrendaren azken alienista (psikiatra), baina bere itzal teorikoak gehiago iraun zuen, psikiatria anglo-saxoiaren garaietaraino, aintzat hartzen bada DSMren azken sailkapena.

Reda Rahmani eta Luis Pacheco

José M. Díaz Zorrozua (J.D.), Leire Erkoreka Anda, Leire Fentanes Hernández, Javi, Mariasun Garay Arostegui, Eva Garnica de Cos, Enrique González Arza (E.G.), Sonia Herrera Anaya, Javi, María José Llarena Cuevas, Ziortza Llona Lasagabaster, Juan Enrique López Fernández, Mónica López Ortiz (M.L.), Óscar Martínez Azumendi (O.M.), Luis Pacheco Yáñez (L.P.), Elena Rodríguez Seoane, Sonia, Reda Rahmani El Ouachekradi.